【承認造波】秘魯中場:法卡奧叫我唔使攻

睇法卡奧出術片:http://bit.ly/2gzagP4 

世盃外南美區賽事最後一輪,智利吞巴西3蛋,最後僅列第6無緣決賽周,秘魯則同哥倫比亞打和得1分,壓過智利列第5,取得附加賽資格。呢場波去到尾段,見到哥倫比亞隊長法卡奧,鬼鬼祟祟掩住個口,同主隊中場連拿度達比亞密斟,跟手該名摩納哥射手,再同秘魯後防講嘢。去到比賽最後階段,秘魯喺後場Hea搓到完場,好多傳媒都思疑,兩軍夾計造波。

查實唔使思疑喇,因為連拿度達比亞已經承認咗:「當時法卡奧走埋嚟,話只要保持住1:1比數,我哋兩隊都可以晉級,足球就係咁,哥倫比亞同秘魯目標都係出線,最後達成願望,我哋都好高興。秘魯當時專注於比賽,最後5分鐘法卡奧表達咗佢嘅睇法,之後佢哋控制住場比賽。」

法卡奧就話,兩軍冇造波:「哥倫比亞同秘魯係知道當時智利嘅賽果,我哋只係因應賽果而去適當咁比賽。而我當時,只係嘗試傳遞呢個訊息。」

哥倫比亞同秘魯咁樣夾計,當然唔係咩光采嘅事,但智利去到外圍賽最後4場,竟然得1勝3負,輸畀巴西都算,但竟然不敵巴拉圭同玻利維亞,最後咁樣畀人夾計迫出局,某程度上只能怪自己。

東網體育同你追實體壇每個精彩時刻!
http://bit.ly/2ecTF2A 


本文来源:http://hk.on.cc/hk/bkn/cnt/sport/20171012/bkn-20171012161017533-1012_00882_001.html